3-დან 4 წლამდე ასაკი

ტრანსპორტი

თამაშის ამოცანა: ვარჯიში სხვადასხვა ტრანსპორტის დასახელებაში

თამაშის მსვლელობა: ბავშვი ზის მაგიდასთან და მშობელი აძლევს მას კუბიკებს, რომლებზედაც დახატულია ტრანსპორტის სხვადასხვა ნაწილები, ან უნდა შეადგინოს ტრანსპორტი და დაასახელოს.

წელიწადის დროები

თამაშის ამოცანა: შეძლოს სურათების დაჯგუფება წელიწადის დროების მიხედვით

თამაშის მსვლელობა: მშობელი აძლევს ბავშვს დაჭრილ სურათებს და ავალებს მას შეადგინოს მთლიანი სურათი და დაასახელოს წელიწადის რომელი დრო შეადგინა.

რისგან არის გაკეთებული (ერთობლივი თამაში)

თამაშის ამოცანა: იცოდეს რა რისგან არის გაკეთებული

თამაშის მსვლელობა: მოთამაშეები სხედან წრიულად. აღმზრდელი ესვრის ბურთს რომელიმე ბავშვს და ამბობს “მაგიდა”. ბავშვმა უნდა თქვას: “ხისგან” და ა. შ.

მაღაზია (ერთობლივი თამაში)

თამაშის ამოცანა: კვების პროდუქტების გაცნობა

თამაშის მსვლელობა: მყიდველები (ბავშვები) მიდიან მაღაზიაში და თხოულობენ სხვადასხვა კვების პროდუქტებს. მაგალითად, “თუ შეიძლება მომეცით შაქარი”, გამყიდველი ეკითხება “როგორია შაქარი?” “თეთრი, ტკბილი”, გამყიდველი მხოლოდ მაშინ აძლევს მყიდველს პროდუქტს, როცა ის ეტყვის მის თვისებებს. იმ შემთხვევაში, თუ მყიდველს გაუჭირდება  საყიდელი პროდუქტების დასახელება, ეხმარებიან ბავშვები და აღმზრდელი.

ჯადოსნური პარკი

თამაშის ამოცანა: საგანთა რიცხვის გამოცნობა

თამაშის მსვლელობა: სურათები ჩაწყობილია პარკში. ბავშვი ჰყოფს ხელს პარკში, იღებს სურათს, აჩვენებს აღმზრდელს და ასახელებს სურათზე გამოსახული ცხოველების რაოდენობას. თუ ბავშვი სწორად ასახელებს სურათს იტოვებს თავისთვის., თუ შეცდა, ცალკე დებს.

თუ ათი სურათიდან 8 გამოიცნო, მაშინ ითვლება მოგებულად.

გამოიცანი, რომელი ყვავილი დავმალე (ერთობლივი თამაში)

თამაშის ამოცანა: მინდვრის ყვავილების დასახელების ცოდნა

თამაშის მსვლელობა: ბავშვები სხედან მაგიდის გარშემო, სდაც აწყვია მათთვის ნაცნობი მინდვრის ყვავილები: ყაყაჩო, ია, ღიღილო. ბავშვები აკვირდებიან ყვავილებს, შემდეგ ირჩევენ რომელიმე მოთამაშეს. ის ხუჭავს თვალებს. იმ დროს მალავენ ერთ-ერთ ყვავილს, როცა აღმზრდელი ეტყვის: “თვალი გაახილე!” მოთამაშე თვალებს ახელს, აკვირდება ყვავილებს და ამბობს, რომელი ყვავილი დამალეს? ვინც გამოიცნობს, მას ტაშს დაუკრავენ.

რა ფრინავს და რა არა

თამაშის ამოცანა: სწრაფი მოფიქრების უნარის განვითარება

თამაშის მსვლელობა: ბავშვი ზის  და აღმზრდელი ასახელებს რომელიმე ცოცხალ არსებას ან რაიმე ნივთს. როდესაც იგი დაასახელებს რომელიმე ფრინველს, მაგალითად, მერცხალს, ბავშვმა ხელი ზევით უნდა ასწიოს და თქვას: “ფრინავს”, როდესაც დაასახელებს ცხოველს, ან რაიმე საგანს, მაგალითად, “ცხენს”, “მაგიდას”, ბავშვმა ხელი არ უნდა ასწიოს და თქვას -  “არ ფრინავს”.

დავაძინოთ თოჯინა (ერთობლივი)

ბავშვები სხედან წრიულად. მათ წინ აღმზრდელი მაგიდაზე დგამს თოჯინას ცარიელ საწოლს, ბავშვებს სურვილი უჩნდებათ მოამზადონ საწოლი თოჯინას დასაძინებლად. საწოლთან დევს ლოგინი, თეთრეული. პირველად რა უნდა გავშალოთ? - ეკითხება აღმზრდელი ბაშვებს.

- ლეიბი, - უპასუხებენ ბავშვები.

- რა გადავაფაროთ ლეიბს?

- ზეწარი.

ბავშვები რიგ-რიგობით გამოდინ მაგიდასთან, იღებენ ლეიბს, ზეწარს, საბანს და აწყობენ საწოლს; შემდეგ ხდიან თოჯინას, აწვენენ, აძინებენ და ფეხაკრეფით გადიან ოთახიდან.

4-დან 6 წლამდე ასაკი

იპოვე ხე

თამაშის ამოცანა: იცოდეს ხეების სახეები

თამაშის მსვლელობა: აღმზრდელი აჩვენებს ბავშვს ფოთლებს და ეკითხება, რომელი ხიდან არის მოწყვეტილი ეს ფოთოლი? ბავშვი ეძებს ხეებს, რომელზედაც ასეთი ფოთლებია, როგორიც მას უჭირავს ხელში.

სწორედ გაანაწილე

თამაშის ამოცანა: იცოდეს გარეული და შინაური ცხოველების გარჩევა

თამაშის მსვლელობა: ბავშვს სთხოვს მშობელი დააჯგუფოს სურათები შინაური და გარეული ცხოველების მიხედვით, შინაური ცხოველები მოათავსოს ეზოში, გარეული  - ტყეში.

თქვი რა გესმის

თამაშის ამოცანა: განმტკიცდეს სმენითი ორიენტაცია და ბგერითი ანალიზების აღქმა

თამაშის მსვლელობა: მშობელი სთავაზობს ბავშვს დახუჭოს თვალები, მოისმინოს და თქვას რა ესმის (ფრინველთა ჟრურტული, გაფრენა, ლაპარაკი, ფეხის ხმა და სხვ.).

რა იპოვა დათუნიამ

თამაშის ამოცანა: სათამაშოების ალაგების ჩვევის განმტკიცება

თამაშის მსვლელობა: მშობელი ეუბნება ბავშვს: “დათუნიამ იპოვა სათამაშოები, რომლებიც შენ აულაგებელი დატოვე თამაშის შედეგ. ჩააწყო პარკში და მოგვიტანა აქ. გავსინჯოთ რა სათამაშოები იპოვა დათუნიამ?”

ბავშვმა უნდა ჩაყოს პარკში ხელი, უნდა დაასახელოს რომელი სათამაშოც მოხვდება და მოათავოს თავის ადგილას.

რას ეკუთვნის

თამაშის ამოცანა: ცნებათა განზოგადების ჩვევის დანერგვა

თამაშის მსვლელობა: მშობელი ჩამოთვლის 5  სხვადასხვა საგანს და ვიდრე 5-8-მდე დაითვლის, ბავშვმა უნდა უთხრას ამ საგნების გამაერთიანებელი, განმაზოგადებელი სიტყვა. მაგალითად, მშობელი ამბობს: “თეფში”, ბავშვმა უნდა უპასუხოს: “ჭურჭელი”, მშობელი: “მუხა” - ბავშვი - “ხე” და ა. შ. 

თამაშის გამეორების დროს შეიძლება პირიქით, ჯერ დაუსახელოს ზოგადი, ბავშვმა კი ჩამოთვალოს კერძო სახე. მაგალითად, მშობელი იტყვის: “ყვავილი”, ბავშვმა უნდა თქვას: “ია, ყაყაჩო, გვირილა” და სხვ.

არ უპასუხო (ერთობლივი თამაში)

თამაშის ამოცანა: ნებისყოფის განვითარება

თამაშის მსვლელობა: ბავშვები სხედან წრიულად. მშობელი დგას ცენტრში და აძლევს შეკითხვებს. წინასწარ შეთანხმებულები არიან, რომ პასუხობს არა ის ბავშვი, ვისაც მშობელი ეკიხება, არამედ მის გვერდით მჯდომი. ვინც ვერ შეიკავებს თავს და პასუხს გასცემს, დროებით გადის თამაშიდან.

უკან დაბრუნება