შეაჩერეთ ბავშვის ყურადღება იმ საგნებსა და მოვლენებზე ,
რომლებიც ადვილად შეიძლება გამორჩეს თვალსაწიერიდან
(გამომეტყველებაზე, მოქმედებაზე, საგნებზე, ჩაცმულობაზე,
შეადარეთ ანალოგიურ საგნებსა და მოვლენებს, ავარჯიშეთ
განლაგებისა და წვრილმანების დამახსოვრებაზე და ა.შ.).
მოთხრობების კითხვისას ჩაეკითხეთ: როგორ მოიქცეოდი შენ რომ იქ
ყოფილიყავი? რას ჰკითხავდი?
თამაში: ჩამოთვალეთ მორიგეობით, რით ჰგავს ერთმანეთს ორი
ნივთი, ცხოველი? რით განსხვავდებიან ისინი ერთმანეთისაგან
(ვაშლი და კომბოსტო, მანქანა და კატერი, კატა და ვეფხვი).
"წაგებულია" ის, ვისაც აღარ ექნება სათქმელი.
თამაში: ჩაიფიქრეთ ნივთი, ბავშვმა უნდა დაგისვათ 10- 20-მდე
შეკითხვა (მაგ; იჭმევა?, სახლში გვაქვს? და ა.შ.) რომ გამოიცნოს.
გაიმეორეთ ეს თამაში როლების შეცვლით.
თამაში დამახსოვრებაზე: თქვენ და ბავშვი წინასწარ დახატულ
სასახლეში თანმიმდევრობით “ინახავთ” წარმოსახვით ნივთებს.
მომდევნო მოთამაშემ უნდა ჩამოთვალოს უკვე “შენახული” ნივთები
და დაამატოს ახალი (მაგ: თქვენ ამბობთ-”სასახლეში გვაქვს: ვაშლი,
ბურთი და.. ფანქარი” მან უნდა გააგრძელოს “სასახლეში გვაქვს:
ვაშლი, ბურთი,ფანქარი და.. სკამი” და ა. შ.).
ერთად დაგეგმეთ წინასწარ, რომელ ტელეგადაცემას უყუროთ,
მიეცით არჩევანის საშუალება. შეზღუდეთ ტელეხედვის დრო 1-2
საათამდე.
წაახალისეთ ბავშვი, რათა თავისი სურვილები განამტკიცოს
არგუმენტებით "იმიტომ, რომ...".
ეშინია ცხოველების, "ცუდი" ადამიანების, სიბნელის, მშობლებთან
განშორების, ტრავმისა. ეცადეთ ხანმოკლე საუბრებით და
ცხოვრებისეული მაგალითებით გაუბათილოთ უსაფუძვლო შიშები.
დაიხმარეთ სახლის და კარ-მიდამოს სამუშაოებში, სადილის
გაკეთებაში. ცომის მოზელისას აუხსენით, რამდენ ფქვილს რამდენი
წყალი და რამდენი მარილი უნდა, რა მნიშვნელობა აქვს რაოდენობას.
შემდეგ გაკვეთილად კარგია, თუ ისწავლის სამკუთხედების და
ისრების დახატვას. "აბა, თუ დახატავ კონვერტს ან სახლს ხელის
აუღებლად, ფანქრის მოუცილებლად". ასწავლეთ "აი ია"-ს დაწერა.
შემდეგ კი ვცადოთ საყვარელი სიტყვების დაწერაც: საკუთარი
სახელი, დე-და, მა-მა, და, ძმა, ბებო, ბაბუ, ახლობლების სახელები.
ცხადია, ბავშვის კალიგრაფია არ იქნება სრულყოფილი. სასურველია
მიაჩვიოთ მსხვილი, თანაბარი ასოებით წერას ხაზზე და ველის
დაცვას.
დაეხმარეთ ბავშვს წიგნების და რვეულების დალაგებაში, თანდათან
მიაჩვიეთ, რომ დამოუკიდებლად შეძლოს ამის გაკეთება. ნუ
ააჩქარებთ. არ დაგავიწყდეთ წახალისება, თუნდაც კეთილი
სიტყვებით.
სასურველია ბავშვი ხშირად ხედავდეს, რომ თქვენ კითხულობთ
წიგნებსა და გაზეთებს.
ასწავლეთ ახალი სიტყვები “სწორია”, “არასწორია”, “სიფრთხილე”,
“შიში”, “ყოჩაღი”, “მეგობარი”..
დაახატინეთ საგანი (მაგ. ასანთის კოლოფი) სხვადასხვა კუთხიდან.
ასწავლეთ მისამართი და ტელეფონის ნომერი, რას ნიშნავს
"სოფელი", "ქალაქი"? ახლო ორიენტირები: ოთახში ნივთების
განლაგება ფანჯრის ან ბავშვის მიმართ, რომელია წინ, უკან, ზევით,
ქვევით, შუაში, გვერდით? შეაქეთ სწორი პასუხისათვის.
ერთად დახატეთ ოთახის, ბინისა და ეზოს ზედხედები. სად ვიბანთ,
სად ვიძინებთ, საიდან შემოვდივართ? სად ვსადილობთ, სად
ვთამაშობთ? დაუხატეთ სახლის, ეზოსა და ახლომდებარე
გზაჯვარედინების ზედხედი; სად არის მაღაზია, მანქანების გზა,
ჩვენი (ფეხით მოსიარულეთა) გზა?
